उपप्रधानमन्त्री कोइराला र नर्वेली मन्त्रीबीच भेट

नर्वे/उपप्रधान तथा परराष्ट्रमन्त्री सुजाता कोइरालाले युरोप भ्रमणका क्रममा नर्वेली विदेशमन्त्री जोनास गार स्टोरसँग ओस्लोमा भेट गरेकी छन् । भेटमा नेपाल-नर्वे द्विपक्षीय सम्बन्ध, विश्व तापमानको असर र अल्पविकसित राष्ट्रहरुले भोगिरहेका समस्याबारे छलफल भएको लन्डनस्थित नेपाली दूतावासले जनाएको छ ।

कोइरालाले नेपालको वर्तमान राजनीतिक समस्या र शान्तिप्रक्रियामा नर्वेले खेलेको भूमिकाको पनि प्रशंसा गरिन् । सामाजिक आर्थिक विकासमा नर्वेले गरेको सहयोगप्रति आभार व्यक्त गर्दै कोइरालाले थप सहयोगका लागि आग्रहसमेत गरेकी थिइन् । प्रत्युत्तरमा नर्वेली विदेशमन्त्रीले नेपाललाई हुने सहयोग निरन्तर रहने प्रतिबद्धता जनाउँदै संविधान लेखन कार्य समयमै सकिएर नेपालमा शान्ति स्थापना भएको हेर्ने चाहना नर्वेको भएको बताएका थिए । नेपालमा महिला सशक्तीकरण, मानवअधिकारको सुनिश्चितता, ओएचसीएचआर र ल्यान्डमाइन सन्धि सम्बन्धमा पनि उनीहरुबीच छलफल भएको थियो ।

भेटपछि कोइराला नर्वेली वातावरण तथा अन्तर्राष्ट्रिय विकासमन्त्री इरिक सोलेमद्वारा आयोजित दिवाभोजसहित छलफलमा व्यस्त भइन् । सो अवसरमा कोइरालाले आपसी सम्बन्ध र नेपालप्रति नर्वेको सहयोग स्मरण गराउँदै पर्यटन वर्ष २०११ सफल बनाउने प्रमुख दलको प्रतिबद्धता सुनाएकी थिइन् । मन्त्री इरिकले नेपालको शान्तिप्रक्रियाका सकारात्मक क्षण स्मरण गर्दै यो तार्किक निष्कर्षमा पुग्ने आशासमेत व्यक्त गरेको दूतावासको विज्ञप्तिमा उल्लेख छ ।

कोइरालाका साथ उनका सल्लाहकार चिरञ्जीवी नेपाल, सभासद् एवं सार्वजनिक लेखा समितिका सभापति रामकृष्ण यादव पनि थिए भने नर्वेली प्रतिनिधिमण्डलबाट महामहिम थोर गिसलेसन, नेपालका लागि नर्वेली राजदूत टोर तोराङ र नेपालको शान्तिप्रक्रियाका विशेष दूतलगायत अन्य विशिष्ट अधिकारी सामेल थिए ।

कोइराला एनआरएन नर्वे र नेपलिज स्टुडेन्ट्स एसोसिएसन नर्वेको कार्यक्रममा पनि सहभागी भएकी थिइन् ।

Last Updated : 2010-03-16 07:09:02 | Text Size :

Print

E-mail

Name
Email Address
Comments

If you can't read the word, click here
Type word shown as above(to stop spam):

* ALL CAPS LETTER